एजेन्सी ।
अमेरिकाले रुसी मिडिया च्यानल आरटीमा नयाँ प्रतिबन्ध लगाएको छ । यो घोषणा गर्दै अमेरिकी विदेशमन्त्री एन्टोनी ब्लिन्केनले यस च्यानललाई ’रुसी गुप्तचर प्रणालीको हिस्सा’ भनेर वर्णन गरेका हुन् ।
‘आरटी रुसी समर्थित मिडिया आउटलेटहरूको नेटवर्कको हिस्सा हो जसले गोप्य रूपमा संयुक्त राज्यमा लोकतन्त्रलाई कमजोर पार्ने प्रयास गरेको छ,’ ब्लिन्केनलेले शुक्रबार पत्रकारहरूलाई भने, ‘रुसी सरकारले साइबर सञ्चालन क्षमताहरू र रुसी गुप्तचरहरूसँग काम गर्ने एकाइलाई आरटीभित्र समावेश गरेको छ ।’
आरटीले सोशल मिडिया प्लेटफर्म एक्समा ब्लिन्केनको टिप्पणीलाई लाइभ स्ट्रिम गर्दै यसलाई अमेरिकाको पछिल्लो षड्यन्त्र भनेको छ । उता, रुसी विदेश मन्त्रालयकी प्रवक्ता मारिया जाखारोभाले रुसमाथि प्रतिबन्ध लगाउने विशेषज्ञ बन्न अमेरिकाले ‘नयाँ काम’ गर्नुपर्ने बताएकी छन् ।
आरटीको कर्मचारी र यसका प्रधानसम्पादक मार्गरिटा सिमोनियनलाई अमेरिकी चुनावलाई प्रभाव पार्ने आरोपमा गत हप्ता प्रतिबन्ध लगाइएको थियो । यूएस स्टेट डिपार्टमेन्टले आरटी (पहिले रूस टुडे) लाई युरोप, अफ्रिका र उत्तर र दक्षिण अमेरिकाका देशहरूमा ‘सूचना सञ्चालन, गुप्त प्रभाव र सैन्य खरिद’ मा संलग्न भएको आरोप लगाएको छ ।
ब्लिन्केनले युक्रेनमा लडिरहेका रुसी सेनाका लागि बडी आर्मर, स्नाइपर राइफल, ड्रोन र अन्य उपकरणहरू किन्नको लागि आरटीलाई अनलाइन फन्डरेजर चलाएको आरोप पनि लगाए ।
