जनकपुरधाम ।
महोत्तरीको जलेश्वर नगरपालिकामा रहेको बजार खसी बोका खरिद गर्नका लागि त्यस भेगका स्थानीयका लागि सहज बजार हो । दशैँ नजिकिदै गर्दा जलेश्वर बजारमा खसी बोका खरिद बिक्री गर्नेहरुको भीड़ बढिरहेको छ । तर सो बजारको ठेक्का नलाग्दा खसी बोका खरिद गर्न पुग्ने ग्राहक ठगिदै आईरहेका छन् ।
जलेश्वर बजारको ठेक्का नलागेको मौका छोपेर नगरपालिकाका कर्मचारी मनमौजी कर उठाउँदै आईरहेको आरोप लगाइएको छ । सामाजिक सञ्जालमा जलेश्वर नगरपालिकाका फायरमैन दिलीप झा र नगरप्रहरी राघवेन्द्र सिंहको मिलोमतोमा त्यो बजारबाट उठ्ने करमा व्यापक अनिमतिता गरिरहेको आरोप सहितको पोस्ट भाइरल भईरहेका छन् ।
जलेश्वर नगरपालिकाले लगाउँदै आएको जलेश्वर बजारको ठेक्का २÷३ महिना पहिले नै समाप्त भएको थियो । ठेक्का समाप्त भएपछि जलेश्वर नगरपालिकाले ४१ लाख रुपैयाँमा ठेक्का आह्वान गर्यो । तर ठेक्काका लागि आह्वान गरिएको टेण्डर कसैले भर्नैै आएन । दुई पटक पनि कोही टेण्डर भर्न नआएपछि अहिले आएर घटाएर २५ लाख रुपैयाँमा टेण्डर आह्वान गरेको जलेश्वर नगरपालिकाका निमित्त प्रमुख प्रशासकीय अधिकृत जयकुमार साहले जानकारी दिए ।
जलेश्वर बजारमा खरिद बिक्री हुने खसी बोकावापत खरिदकर्ता तथा बिक्रीकर्ता दूबैको तर्फबाट १÷१ प्रतिशत कर उठाउने प्रावधान रहेको छ । यही करमा ती कर्मचारीहरुले ठेक्केदार नरहेको मौका छोपेर अनियमितता गरिरहेको आरोप लगाइएको छ ।
तर यो आरोपको नगरपालिकाका निमित्त प्रमुख प्रशासकिय अधिकृत साह खण्डन गर्छन् । यस विषयमा हामी समक्ष समेत गुनासो आएको थियो, उनले भने भने‘राजश्व शाखा प्रमुख राहुल श्रीवास्तवको संयोेजकत्वमा अनुगमन टोली खटायौँ, तर त्यो अनुगमनबाट हामीले कुनै किसिमको गरबरी पाएनौँ ।’
