काठमाडौँ ।
लोकतान्त्रिक समाजवादी पार्टी (लोसपा) नेपाल आगामी बैशाखमा महाधिवेशन गर्ने तयारी गरेको छ । तमलोपा हुँदै विभिन्न पार्टीसँग एकीकरण तथा टुटफुट हुँदै पछिल्लो समय जनता समाजवादी पार्टी पार्टीबाट अलग भएर लोकतान्त्रिक समाजवादी पार्टीको निर्माण भएको हो ।
लोसपा नेपालले गत भदौ ९ गते ३ वर्ष पूरा गरिसकेको छ । तमलोपा हुँदै लोसपासम्मको यात्रामा एक पटक २०७३ मा महाधिवेशन भएको यो पार्टीमा आठ वर्षपछि पुनः महाधिवेशन हुन लागेको हो । लोसपा नेपालको महाधिवेशन वैशाखमा हुन लागेको छ । तमलोपापछि राजपा, जसपा नेपाल हुँदै लोसपा नेपाल बनेको हो । त्यो अवधिमा एउटा महाधिवेशन मात्र गराएका लोसपाका अध्यक्ष महन्थ ठाकुर यस पटक २०८२ वैशाखमा जसरी पनि महाधिवेशन गर्ने तयारीमा जुटेका छन् । त्यसका लागि साधारण सदस्यता वितरण कार्य सुरु भइसकेको छ ।
असार मसान्तसम्म पहिलो चरणको सदस्यता वितरण कार्यक्रम सुरु गरिएको थियो । जिल्ला जिल्लामा त्यसका लागि पाँच लाख सदस्यता पठाइएको थियो । त्यसमध्ये कति काटियो, कति बाँकी छ भन्ने अभिलेख पार्टीले तयार भईरहेको छ ।
महाधिवेशनकै तयारीका लागि भदौ १९ गते पदाधिकारीको बैठक बस्ने लोसपा नेपालका वरिष्ठ उपाध्यक्ष जितेन्द्र सोनलले बताए । सो बैठकले महाधिवेशनका लागि के कस्तो तयारी गर्ने भन्नेबारेमा छलफल गर्नुको साथै आवश्यकता अनुसार तयारी समिति बनाउने उनले बताए ।
