जनकपुरधाम ।
गृहमन्त्री रमेश लेखकले प्रहरी समायोजन प्रकृया तथा प्रदेश प्रहरी गठन प्रकृया अगाडी बढाई सकिएको बताएका छन ।
बिहिबार बिहान जनकपुरधाम विमानस्थलमा संचारकर्मीहरुसंग कुराकानी गर्दै गृहमन्त्री लेखकले प्रहरी समायोजन तथा प्रदेश प्रहरी गठन प्रकृया अगाडी बढाई सकिएको र चाँडै प्रहरी समायोजन ऐन संसदमा प्रवेश पाउने जानकारी दिए । उनले नेपाल प्रहरी ऐन २०१२ मा आवश्यक संशोधन गर्ने, परिमार्जन गर्ने वा कानुनै नयाँ बनाउने गरी गृहमन्त्रालयबाट प्रक्रिया अगाडी बढाइएको र सो फाइल अर्थ मन्त्रालयमा रहेको बताए । विभिन्न मन्त्रालयबाट सहमति पाई सकेपछि प्रहरी समायोजन ऐन संसदमा प्रवेश पाउने गृहमन्त्री लेखकले जानकारी दिए । उनले वर्तमान सरकारले मुलुकमा शान्ति, सुव्यवस्था र विधिको शासन कायम गर्नका लागि वर्तमान सरकार प्रतिबद्ध रहेको दावी गरे । ‘यो सरकार डेलिभरी दिनका लागि बनेको हो, डेलिभरी हुन्छ, मुलुकमा शान्ति, सुव्यवस्था, विधिको शासन कायम हुन्छ,’ उनले भने ।
