जनकपुरधाम ।
मधेसका मुख्यमन्त्री सतिशकुमार सिंहले प्रदेश सरकारले कमला पुल निर्माणकालागि प्रदेश सरकार आफै गम्भिर रहेको समयमा युवाहरु आमरण अनशनमा बस्नुको औचित्य नरहेको प्रतिक्रिया दिएका छन् । उनले प्रदेश सरकार आफै कमला पुल निर्माणका लागि पहल द्रुत गतिमा गरिरहँदा समेत सिधै आएर आमरण अनशनमा बस्नु स्टन्ट जस्तो लागिरहेको आरोप लगाए ।
गत साउन २७ गते नयाँ कमला पुल निर्माण संघर्ष समिति सिरहा–धनुषाका साथीहरुले मलाई एक सूत्रीय माग राखेर ज्ञापन पत्र बुझाउनु भएको थियो, मुख्यमन्त्री सिंहले भने ‘उहाँहरुकै ज्ञापन पत्रमा एकसाता भित्र नयाँ पुल निर्माण सम्भव नरहेको र यसका लागि संघ सरकारसंग पहल गर्न भन्नु भएको रहेछ ।’ मुख्यमन्त्री सिंहले अगाडी भने ‘उनीहरुको मागलाई गम्भिरताका साथ लिएर सोही दिन हामीले प्रधानमन्त्री तथा मन्त्रीपरिषद कार्यालयलाई बोधार्थ राखेर संघिय भौतिक पूर्वाधारलाई माग सहित पत्र पनि लेखिसकेका छौँ ।’ यसका साथै मधेस सरकारको गत साउन ३१ गते बसेको मन्त्रीपरिषद बैठकबाट हुलाकी राजमार्ग अन्तर्गत पर्ने नयाँ कमला पुल निर्माणका लागि माग गर्ने निर्णय समेत गरिएको उनले जानकारी दिए । यद्यपि प्रदेश सरकार गम्भिरता देखाउँदै उनीहरुको मागलाई लिएर यति गतिमा काम गरिरहँदा समेत संघर्ष समितिका साथीहरु आमरण अनशनमा बस्नु स्टन्ट जस्तै लागिरहेको मुख्यमन्त्री सिंहले आरोप लगाए ।
उनले संघ सरकारले कमलामा पुल निर्माण नगरे प्रदेश सरकार आफै त्यहाँ बजेट छुट्याएर पुल निर्माण गर्न सक्छ कि सक्दैन भन्ने विषयमा समेत छलफल अगाडी बढाई सकिएको बताए ।
