काठमाडौं ।
संघीय निजामती विधेयकको कुलिङ पिरियडमा भएको छेडखानीबारे छानबिन गर्नको लागि गठन संसदीय समितिले कामलाई तीव्रता दिएको छ। समितिले विज्ञहरूलाई राखेर छानबिन प्रक्रिया अघि बढाएको हो।
समिति गठन भएको आज १२ दिनमा १८ बैठक बसेको समितिका संयोजक जीवन परियारले बताए। आजको बैठकमा समितिले संविधानविद् काशीराज दाहाललाई पनि बैठकमा सहभागी गराएको थियो।
बाँकी कामहरू कसरी अघि बढाउने भन्नेबारेमा विज्ञहरूसँग छलफल गरेको उनले बताए।
उनले भने, ‘संविधानविद् काशीराज दाहाललाई विज्ञको रूपमा आजदेखि समितिमै बस्ने गरी तयारी गरेका छौँ। महान्यायाधिवक्ताको कार्यालयलाई पत्राचार गरेर एक जना सहन्यायाधिवक्ता आउनुभएको छ, भने एक जना उपन्यायाधिवक्तासमेत हाम्रो बैठकमा निरन्तर रहने गरी छानबिनमा सहयोग पु¥याउन आग्रह गरेका थियौँ। सोही बमोजिम उहाँहरू आजको बैठकमा सहभागी हुनुहुन्छ।’
उनले छलफल जारी रहेको भन्दै अनुसन्धान धेरै काम ठुँगिसकेको बताए। समितिले प्रतिवेदन बुझाउनको लागि २१ दिनको समय पाएको छ।
समितिमा कांग्रेसबाट जीवन परियार र सुशीला थिङ, एमालेबाट नारायणप्रसाद आचार्य र ईश्वरी घर्ती, माओवादीबाट माधव सापकोटा, रास्वपाबाट गणेश पराजुली र राप्रपाबाट रोशन कार्की सदस्य छन्।
समितिले पारित गरेको विधेयकमाथि छेडखानी गरेपछि सत्तारुढ दलकै सांसदहरूले राज्य व्यवस्था तथा सुशासन समितिको सभापति रामहरि खतिवडाको राजीनामा मागेका थिए। तर उनले आफ्नो कुनै संलग्नता नरहेको जिकिर गर्दै दोषी देखिए कारबाही भोग्न तयार रहेको बताउँदै आइरहेका छन्।
